ट्रिप एडभाइजरको सूचीमा काठमाडौं तेस्रो

PUBLISHED August 17, 2014

संसारका उत्कृष्ट १० उदीयमान पर्यटकीय गन्तव्यको सूचीमा काठमाडौं पनि परेको छ । काठमाडौं यो सूचीमा पर्ने दक्षिण एसियाली मुलुकको एकमात्र गन्तव्य हो । विश्वविख्यात ट्राभल वेबसाइट ट्रिप एडभाइजरले यो सूची तयार गर्छ । यो वर्षको सूचीमा काठमाडौं तेस्रो नम्बरमा छ । यो वेबसाइटले लाखौं पर्यटकहरुको प्रतिक्रिया र समीक्षाका आधारमा उत्कृष्ट १० गन्तव्यको सूची सार्वजनिक गर्छ ।

संसारका ठूला टुर अपरेटरहरुले यो सूचीलाई आफ्नो ब्रोसरमा राख्छन् । ट्रिप एडभाइजरको सूचीलाई पछ्याउँदै धेरै पर्यटक घुम्न निस्किन्छन् । ट्रिप एडभाइजरले विश्वकै पर्यटन बजारलाई प्रभावित पार्छ । ट्रिप एडभाइजर वेबसाइट प्रतिमहिना २५ करोडभन्दा बढील हेर्ने बताइएको छ । यसले अमेरिका, एसिया, अफ्रिका तथा यूरोपलाई समेटेको छ ।

ट्रिप एडभाइजरको सूचीमा पहिलो स्थानमा  क्युवाको हवाना, दोस्रोमा कोस्टारिकाको ला फोच्र्युना, तेस्रोमा नेपालको काठमाडौं, चौथोमा इजरायलको जेरुसेलम र पाँचौंमा पेरुको सुस्को छन् । त्यस्तै छैठौंमा बेलिजको एम्बर्गिस, सातौंमा जापानको साप्पोरो, आठौंमा भियतनामको हनोइ, नवौंमा स्पेनको कोरालेज्जो र दशौं नम्बरमा ब्राजिलको फोर्टालेज्जा छन् ।

ट्रिप एडभाइजरले काठमाडौंलाई अग्रसूचीमा राख्नुले नेपालको पर्यटन क्षेत्रमा सकारात्मक प्रभाव पार्ने अपेक्षा गरिएको छ । धेरै पर्यटक यसकै आधारमा घुम्न निस्किने भएकाले नेपालका पर्यटक बढ्ने विश्वास सरोकारवालाले गरेका छन् । यो सूचीबाट नेपालको प्रचारप्रसार विश्व स्तरमा हुनेछ ।